విజయనగరం, సెప్టెంబరు 16: జిల్లాలో సెప్టెంబరు 17 నుంచి అక్టోబర్ 2 వరకు నిర్వహించనున్న 'స్వచ్ఛత హి సేవా - 2026' కార్యక్రమాలను సమర్థవంతంగా చేపట్టాలని జిల్లా కలెక్టర్ ఎస్. రాంసుందర్ రెడ్డి అధికారులను ఆదేశించారు. బుధవారం కలెక్టరేట్ నుంచి నిర్వహించిన వీడియో కాన్ఫరెన్స్‌లో ఆయన ఈ కార్యక్రమాల షెడ్యూల్, విధివిధానాలను వెల్లడించారు.

స్వచ్ఛత కార్యక్రమాల షెడ్యూల్

సెప్టెంబరు 17-18 తేదీల్లో 'స్వచ్ఛ పాఠశాల – యువ ఫర్ స్వచ్ఛత' కార్యక్రమంలో భాగంగా వ్యర్థాల విభజనపై విద్యార్థులకు అవగాహన కల్పించడంతో పాటు స్వచ్ఛత జ్ఞాన యాత్రలు, వర్షపు నీటి సంరక్షణపై చర్చలు నిర్వహించనున్నారు. సెప్టెంబరు 19-20 తేదీల్లో టార్గెట్ యూనిట్ల సుందరీకరణలో భాగంగా అపరిశుభ్ర ప్రాంతాలను శుభ్రపరచడంతో పాటు సెల్ఫీలు, సోషల్ మీడియా ద్వారా ప్రచారం చేపడతారు.

సెప్టెంబరు 21-22 తేదీల్లో బస్టాండ్లు, మార్కెట్లు, ఆసుపత్రులు, నీటి వనరులు, పర్యాటక ప్రాంతాల్లో ప్రత్యేక పారిశుద్ధ్య డ్రైవ్‌లు, సింగిల్ యూజ్ ప్లాస్టిక్ నిరోధక చర్యలు చేపట్టనున్నారు. సెప్టెంబరు 23-24 తేదీల్లో డోర్-టు-డోర్ ప్రచారం, 4-వే సెగ్రిగేషన్, హోమ్ కంపోస్టింగ్, గుడ్డ సంచుల వాడకంపై అవగాహన కల్పించే జన్ భాగీదారి అడ్వొకేసీ డ్రైవ్‌లు నిర్వహిస్తారు.

సెప్టెంబరు 25-26 తేదీల్లో వినాయక నిమజ్జనం అనంతరం ఘాట్ల పరిశుభ్రతతో పాటు క్రీడా మైదానాల్లో జీరో-వేస్ట్ పోటీలు, స్వచ్ఛతా డ్రైవ్‌లు చేపడతారు. సెప్టెంబరు 27న ప్రపంచ పర్యాటక దినోత్సవం సందర్భంగా చారిత్రక, పర్యాటక ప్రదేశాల శుభ్రత, పబ్లిక్ టాయిలెట్ల వద్ద దీపాలంకరణ నిర్వహిస్తారు.

సెప్టెంబరు 28-29 తేదీల్లో 'వ్యర్థాల నుండి సంపద (RRR)' కార్యక్రమంలో భాగంగా వ్యర్థాలతో కళాఖండాలు ('కబాడ్ సే కలా'), రీసైక్లింగ్ మేళాలు నిర్వహించి ఉత్తమ సృష్టికర్తలను సత్కరిస్తారు. సెప్టెంబరు 30న 'సఫాయి మిత్ర సురక్షా' కార్యక్రమంలో భాగంగా పారిశుద్ధ్య కార్మికులకు ఆరోగ్య పరీక్షలు, రక్షణ పరికరాల అందజేత, సన్మానం చేపడతారు.

అక్టోబర్ 1న 'ఏక్ దిన్, ఏక్ ఘంటా, ఏక్ సాత్' కార్యక్రమంలో భాగంగా ప్రజలు, అధికారులు సమిష్టిగా శ్రమదానం చేపడతారు. అక్టోబర్ 2న స్వచ్ఛ భారత్ దివస్ సందర్భంగా ప్రత్యేక గ్రామసభలు, పట్టణ కౌన్సిల్ సమావేశాలు, మొక్కలు నాటే కార్యక్రమాలు నిర్వహించనున్నారు.

అధికారులకు ముఖ్యమైన ఆదేశాలు

పట్టణ, గ్రామీణ ప్రాంతాల్లో ముందుగానే స్పష్టమైన షెడ్యూల్ రూపొందించి పూర్తిస్థాయిలో డాక్యుమెంటేషన్ చేయాలని కలెక్టర్ అధికారులను ఆదేశించారు. ప్రజా మరుగుదొడ్లను సురక్షితమైన, శుభ్రమైన ప్రమాణాలకు అనుగుణంగా నిర్వహించాలని సూచించారు. అధికారులు, స్థానిక సంస్థలు, ప్రజాప్రతినిధులు సమన్వయంతో పనిచేసి ఈ కార్యక్రమాన్ని విజయవంతం చేయాలని ఆయన పిలుపునిచ్చారు.