విజయనగరం, సెప్టెంబర్ 26: తుఫాన్ ప్రభావంతో కురిసిన భారీ వర్షాలకు నష్టపోయిన రాజాం నియోజకవర్గంలోని వంగర, సంతకవిటి మండలాల్లో రాష్ట్ర మంత్రి కొండపల్లి శ్రీనివాస్, ఎంపీ కలిశెట్టి పర్యటించి పరిస్థితిని సమీక్షించారు.
- అరసాడ వద్ద దెబ్బతిన్న కాజ్‌వేను పరిశీలించిన మంత్రి — యుద్ధప్రాతిపదికన పునరుద్ధరణకు, ప్రత్యామ్నాయ ఏర్పాట్లకు ఆదేశం
- సంతకవిటి మండలంలో సాయన్న గెడ్డ పొంగిపొర్లడంతో 12 గ్రామాల పరిధిలో సుమారు 7 వేల ఎకరాల వరి పంట ముంపు
- రామారాయపురం, మంతెన, ఒంజరం, పొదలి, గెడ్డబూరాడపేట, పనసపేట, వాల్తేరు తదితర గ్రామాల్లో పంట నష్టం
- ప్రతి ఏటా ఇదే పరిస్థితి ఎదురవుతోందని మంత్రికి వాపోయిన రైతులు
- వ్యవసాయ అధికారుల అంచనా ప్రకారం 5 వేల నుంచి 10 వేల ఎకరాల వరకు నష్టం జరిగి ఉండవచ్చని మంత్రి వెల్లడి
- ఇప్పటికే రూ.30 లక్షలతో ఇరిగేషన్ పనులు చేపట్టామని, గెడ్డ కాలువ డీసిల్టేషన్‌తో సహా పూర్తిస్థాయి ఇరిగేషన్ పనులు త్వరలో చేపడతామని ప్రకటన
- 12 గ్రామాలకు శాశ్వత పరిష్కారం కోసం జిల్లా అధికార యంత్రాంగంతో ప్రత్యేక సమావేశం ఏర్పాటు చేస్తానని మంత్రి హామీ
వరద తగ్గిన తర్వాత పూర్తి స్థాయిలో నష్టాన్ని నమోదు చేస్తామని, ప్రకృతి విపత్తుల్లో ప్రభుత్వం రైతులకు అండగా ఉంటుందని మంత్రి కొండపల్లి శ్రీనివాస్ భరోసా ఇచ్చారు. నష్టపోయిన ప్రతి రైతుకు నష్టపరిహారం అందేలా చర్యలు తీసుకుంటామని ఆయన తెలిపారు.
అరసాడ వద్ద దెబ్బతిన్న కాజ్‌వేను పరిశీలించిన మంత్రి, రహదారిని యుద్ధప్రాతిపదికన పునరుద్ధరించి ప్రజలకు ఇబ్బందులు లేకుండా ప్రత్యామ్నాయ ఏర్పాట్లు చేయాలని, నిరంతర పర్యవేక్షణ చేపట్టాలని అధికారులను ఆదేశించారు. అనంతరం సంతకవిటి మండలం రామారాయపురం, మంతెన, ఒంజరం గ్రామాల మధ్య ఉన్న సాయన్న గెడ్డ (గెడ్డ కాలువ) పొంగిపొర్లడంతో ముంపునకు గురైన పంట పొలాలను పరిశీలించారు. రామారాయపురం, ఒంజరం, పొదలి, మంతెన, గెడ్డబూరాడపేట, పనసపేట, వాల్తేరు తదితర 12 గ్రామాల పరిధిలో సుమారు 7 వేల ఎకరాల వరి పంట నీట మునిగింది. ప్రతి ఏటా ఇదే పరిస్థితి ఎదురవుతోందని రైతులు మంత్రికి వాపోయారు.
ఈ సందర్భంగా మంత్రి మాట్లాడుతూ, ఇప్పటికే ఈ ప్రాంతంలో రూ.30 లక్షలతో ఇరిగేషన్ పనులు చేపట్టామని, వరద ముప్పు శాశ్వతంగా తొలగిపోయేలా గెడ్డ కాలువ డీసిల్టేషన్‌తో సహా పూర్తి స్థాయి ఇరిగేషన్ పనులు త్వరలో చేపడతామని తెలిపారు. 12 గ్రామాలకు శాశ్వత పరిష్కారం కోసం జిల్లా అధికార యంత్రాంగంతో ప్రత్యేక సమావేశం ఏర్పాటు చేస్తానని హామీ ఇచ్చారు.