అంతర్జాతీయ న్యాయ నైపుణ్యాలను ఆర్టిఫిషియల్ ఇంటెలిజెన్స్ (ఏఐ) ఆధారిత సేవలతో అనుసంధానిస్తూ ఏర్పాటు చేసిన కావేటి ఇంటర్నేషనల్ ఏఐ ఫర్మ్ హైదరాబాద్ కార్యాలయాన్ని సోమవారం నీటిపారుదల, పౌర సరఫరాల శాఖ మంత్రి ఎన్. ఉత్తమ్ కుమార్ రెడ్డి ప్రారంభించారు.
ఈ సందర్భంగా మంత్రి మాట్లాడుతూ వివిధ వృత్తిపరమైన రంగాల్లో ఏఐ వినియోగం వేగంగా పెరుగుతోందని, దీనివల్ల అపారమైన అవకాశాలతో పాటు సాంకేతికతను బాధ్యతాయుతంగా, నైతికంగా, పారదర్శకంగా వినియోగించాల్సిన అవసరం కూడా ఏర్పడుతోందని అన్నారు. బలమైన టెక్నాలజీ వ్యవస్థ, నైపుణ్యం కలిగిన మానవ వనరులు, అంతర్జాతీయ అనుసంధానం వంటి ప్రత్యేకతలతో ఏఐ ఆధారిత ప్రొఫెషనల్, న్యాయ సేవలకు హైదరాబాద్‌ను కీలక కేంద్రంగా అభివృద్ధి చేసే అవకాశం ఉందని తెలిపారు.
కావేటి లా ఫర్మ్, న్యూయార్క్ వ్యవస్థాపకుడు, మేనేజింగ్ అటార్నీ, అలాగే కావేటి ఇంటర్నేషనల్ ఏఐ ఫర్మ్ వ్యవస్థాపకుడు డాక్టర్ శ్రీనివాస్ రావు కావేటిని మంత్రి అభినందించారు. తెలంగాణకు చెందిన డాక్టర్ కావేటి 35 సంవత్సరాలకు పైగా అంతర్జాతీయ న్యాయ రంగంలో సేవలందిస్తూ భారత్, అమెరికా, బ్రిటన్, ఆస్ట్రేలియా, కెనడా, యూఏఈ తదితర దేశాల్లో సరిహద్దు దాటి జరిగే న్యాయ వ్యవహారాల్లో అనుభవం కలిగి ఉన్నారు.
హైదరాబాద్‌లో ఏర్పాటు చేసిన ఈ కొత్త కేంద్రం ఇంటర్నేషనల్ లీగల్ యాక్సెస్ హబ్‌గా పనిచేయనుంది. దీని ద్వారా వ్యక్తులు, వ్యాపార సంస్థలు, ఎన్నారైలు, పెట్టుబడిదారులు వివిధ దేశాల్లో న్యాయ సేవలు అందించే న్యాయవాదులు, న్యాయ నిపుణులతో అనుసంధానం కావచ్చు. అమెరికా, బ్రిటన్, యూఏఈ, భారత్‌లలో ఇమ్మిగ్రేషన్, కుటుంబ న్యాయం, సివిల్ లిటిగేషన్, కార్పొరేట్, క్రిమినల్ లా వంటి పలు రంగాల్లో ఫర్మ్ న్యాయ సేవలు అందించనుంది.
హైదరాబాద్ కేంద్రంలో న్యాయ సేవల్లో ఏఐను బాధ్యతాయుతంగా వినియోగించడంపై ప్రధానంగా దృష్టి సారించనున్నట్టు సంస్థ తెలిపింది. న్యాయ పరిశోధన, సమాచార సేకరణ, పత్రాల విశ్లేషణ వంటి పనుల్లో ఏఐను సహాయక సాధనంగా మాత్రమే వినియోగిస్తామని, న్యాయ సలహాలు, ప్రాతినిధ్యం వంటి సేవలను అర్హత కలిగిన న్యాయ నిపుణులే అందిస్తారని స్పష్టం చేసింది.
హైదరాబాద్‌లోని టెక్నాలజీ సామర్థ్యాలను అంతర్జాతీయ ప్రొఫెషనల్ నెట్‌వర్క్‌లతో అనుసంధానించే ఇలాంటి కార్యక్రమాలు తెలంగాణను ఆవిష్కరణలు, జ్ఞానాధారిత సేవలకు అంతర్జాతీయ గమ్యస్థానంగా తీర్చిదిద్దడంలో దోహదపడతాయని ఉత్తమ్ కుమార్ రెడ్డి విశ్వాసం వ్యక్తం చేశారు.