న్యూఢిల్లీ, సెప్టెంబర్ 29: ఓటర్ల జాబితా సవరణలో అవకతవకలు జరిగాయని కాంగ్రెస్ అధ్యక్షుడు మల్లికార్జున ఖర్గే ఆరోపించారు. ప్రధాన ఎన్నికల కమిషనర్ జ్ఞానేశ్ కుమార్‌ను వెంటనే తొలగించాలని డిమాండ్ చేశారు. అవకతవకలకు ప్రధాని మోదీ నైతిక బాధ్యత వహించి రాజీనామా చేయాలన్నారు.
ప్రజాస్వామ్య పునాదులను, రాజ్యాంగబద్ధమైన స్వతంత్ర వ్యవస్థలను ఒక క్రమపద్ధతిలో ధ్వంసం చేస్తున్నారని కేంద్ర ప్రభుత్వంపై తీవ్రస్థాయిలో ఆరోపణలు గుప్పించారు. మంగళవారం దిల్లీలో జరిగిన కాంగ్రెస్ వర్కింగ్ కమిటీ (సీడబ్ల్యూసీ) సమావేశంలో ఆయన ఈ వ్యాఖ్యలు చేశారు.
ఎన్నికల జాబితాల్లో మార్పులకు సంబంధించిన సమాచారం మొత్తం బహిర్గతం చేయాలని, రాజకీయ పార్టీలకు ఓటర్ల జాబితాలను సకాలంలో అందించాలని, ఎన్నికల ప్రక్రియలో పారదర్శకత పెంచాల్సిన అవసరం ఉందని ఖర్గే సూచించారు. ఎన్నికల కమిషన్‌లోని ఇద్దరు కమిషనర్లు.. సీఈసీ చర్యలు ఏకపక్షంగా ఉన్నాయని పేర్కొన్నారని ఖర్గే వెల్లడించారు. ఈ నేపథ్యంలో ప్రధాన ఎన్నికల కమిషనర్ ఆ పదవిలో కొనసాగడానికి అనర్హుడని వ్యాఖ్యానించారు. సీఈసీ జ్ఞానేశ్ కుమార్ భాజపా చేతిలో కీలుబొమ్మలా మారారని విమర్శించారు.
ఎన్నికల ప్రక్రియ నిష్పక్షపాతంగా సాగేందుకు, ప్రతి భారతీయుడి ఓటుహక్కును కాపాడేందుకు పోరాటాలకు పార్టీ శ్రేణులు సిద్ధం కావాలని ఖర్గే పిలుపునిచ్చారు. అవసరమైతే వాటిని సాధించేందుకు కాంగ్రెస్ పార్టీ రోడ్లపైకి వచ్చి ఆందోళనలు చేపడుతుందని చెప్పారు. ఈ సందర్భంగా రాహుల్ గాంధీకి అండగా నిలిచిన పార్టీ నేతలు, కార్యకర్తలకు ఖర్గే కృతజ్ఞతలు తెలిపారు.