కార్వార్, అక్టోబర్ 17 (ఎక్స్‌ప్రెస్ టుడే): భారత నౌకాదళం శుక్రవారం కర్ణాటకలోని కార్వార్ నౌకా స్థావరంలో స్వదేశీ పరిజ్ఞానంతో నిర్మించిన తొలి బహుళార్థక నౌక (మల్టీ పర్పస్ వెసల్) ఐఎన్ఎస్ సమర్థక్‌ను అధికారికంగా నౌకాదళంలోకి ప్రవేశపెట్టింది.
నౌకాదళం కోసం నిర్మిస్తున్న నాలుగు బహుళార్థక నౌకల్లో ఇది మొదటిది. కేంద్ర ప్రభుత్వ ‘మేక్ ఇన్ ఇండియా’ కార్యక్రమం కింద లార్సెన్ అండ్ టూబ్రో (ఎల్ అండ్ టీ) సంస్థ చెన్నై సమీపంలోని కట్టుపల్లి షిప్‌యార్డ్‌లో దీనిని రూపొందించి, నిర్మించింది. నౌకలో 75 శాతానికి పైగా స్వదేశీ పరికరాలు వినియోగించారు.
సమర్థక్ పొడవు 107 మీటర్లు, వెడల్పు 18.6 మీటర్లు కాగా, 3,750 టన్నులకు పైగా బరువును మోయగలదు; గరిష్ఠ వేగం 15 నాట్లు. సముద్ర గస్తీ, నిఘాతో పాటు లక్ష్యాల ప్రయోగం, కొత్త ఆయుధ వ్యవస్థల పరీక్షలు, మానవరహిత వ్యవస్థలకు మాతృనౌకగా పనిచేయడం, విపత్తు సహాయం, పరిమిత స్థాయిలో ఆసుపత్రి నౌకగా మారడం, నౌకల రక్షణ సహాయ చర్యల వంటి బాధ్యతలను ఇది నిర్వర్తిస్తుంది.
నౌక చిహ్నంలో అలల నుంచి పైకి వస్తున్న భారతీయ ఏనుగు బొమ్మ ఉంటుంది. రెండో బహుళార్థక నౌకను ఎల్ అండ్ టీ ప్రస్తుతం నిర్మిస్తోంది.