దేశవ్యాప్తంగా మాదక ద్రవ్యాల వ్యాపారాన్ని 2029 డిసెంబర్ 31 నాటికి సమూలంగా నిర్మూలించాలని కేంద్ర హోంమంత్రి అమిత్ షా లక్ష్యంగా నిర్దేశించారు. న్యూఢిల్లీలో మంగళవారం ప్రారంభమైన మూడో జాతీయ యాంటీ-నార్కోటిక్స్ టాస్క్‌ఫోర్స్ (ఏఎన్టీఎఫ్) చీఫ్ల సదస్సులో ప్రారంభోపన్యాసం చేస్తూ, లక్ష్యం, కాలపరిమితి, జవాబుదారీతనాన్ని నిర్దేశించి మాదక ద్రవ్యాలపై నిర్ణయాత్మక పోరాటం సాగించాల్సిన అవసరాన్ని ఆయన నొక్కిచెప్పారు.
- నార్కోటిక్స్ కంట్రోల్ బ్యూరో (ఎన్సీబీ) ఆధ్వర్యంలో 36 రాష్ట్రాలు, కేంద్రపాలిత ప్రాంతాల ఏఎన్టీఎఫ్ చీఫ్ల భాగస్వామ్యంతో రెండు రోజుల సదస్సు
- 35కుపైగా శాఖలతో సంప్రదింపుల అనంతరం రూపొందించిన 'విజన్ డాక్యుమెంట్ 2026-2029' ఆవిష్కరణ — నాలుగు మూల స్తంభాలుగా అమలు
- లఖ్నవూ, దెహ్రాదూన్లలో ఎన్సీబీ కొత్త జోనల్ కేంద్రాలకు శంకుస్థాపన చేసిన అమిత్ షా
- మాదక ద్రవ్యాలపై అవగాహన కల్పించేందుకు టీవీ ప్రకటనల విడుదల, మెరుగైన పనితీరు కనబరిచిన రాష్ట్రాల ఏఎన్టీఎఫ్లకు సత్కారం
'విజన్ డాక్యుమెంట్ 2026-2029' అమలు, పర్యవేక్షణ, నిబద్ధత గురించి రాష్ట్రాలు, కేంద్రపాలిత ప్రాంతాలు కేంద్రంతో కలిసి సమన్వయంతో 'మిషన్ మోడ్‌'లో పనిచేయాలని అమిత్ షా కోరారు. ఎన్ఫోర్స్మెంట్-ఇంటెలిజెన్స్-ఆపరేషన్స్, ముడిపదార్థాలు-సింథటిక్ డ్రగ్స్ నియంత్రణ, డిమాండ్-హానికర ప్రభావాల తగ్గింపు, సామర్థ్య నిర్మాణం-సమన్వయం అనే నాలుగు వ్యూహాత్మక మూల స్తంభాలపై ఈ డాక్యుమెంట్ ఆధారపడి ఉందని, వంద కంటే ఎక్కువ లక్ష్యాలను ఇందులో పొందుపరిచినట్టు ఆయన వివరించారు.
'సమావేశం నుంచి కార్యాచరణకు, నివేదికల నుంచి ఫలితాలకు, స్వాధీనం నుంచి నెట్‌వర్క్ నిర్మూలనకు, కేసు నుంచి శిక్షకు' అనే విధానంతో ముందుకు సాగాలని అమిత్ షా పిలుపునిచ్చారు. ఏఎన్టీఎఫ్లను 'యాంటీ-నార్కో మిషన్ కమాండ్'గా మలచాలని, కేవలం స్వాధీనాలపైనే కాకుండా మొత్తం మాదక ద్రవ్యాల నెట్‌వర్క్‌లను ధ్వంసం చేయడంపై దృష్టి సారించాలని ఆయన సూచించారు. దేశంలోకి ఒక్క గ్రాము మాదక ద్రవ్యం కూడా ప్రవేశించకుండా, బయటకు వెళ్లకుండా చూడాలని, అదే సమయంలో యువతను కాపాడుకునే దృక్పథంతో కరుణతో ఈ పోరాటం సాగించాలని పేర్కొన్నారు.
2023లో తొలి జాతీయ సదస్సు ద్వారా సంస్థాగత యంత్రాంగాన్ని ఏర్పాటు చేసినట్టు, రెండో సదస్సులో దానిని బలోపేతం చేసినట్టు అమిత్ షా గుర్తుచేశారు. మూడో సదస్సు ఈ రోడ్‌మ్యాప్‌ను నిర్ణయాత్మక పోరాటంగా మలుస్తుందని ఆయన విశ్వాసం వ్యక్తం చేశారు. 2047 నాటికి వికసిత్ భారత్ లక్ష్య సాధనలో, భావి తరాలను కాపాడుకోవడంలో మాదక ద్రవ్యాల రహిత భారత్ నిర్మాణమే ఏకైక మార్గమని ఆయన అభిప్రాయపడ్డారు.