రాష్ట్రంలో స్థానిక సంస్థల ఎన్నికలపై ఎన్డీయే కూటమిని అప్రమత్తం చేశారు ముఖ్యమంత్రి నారా చంద్రబాబు నాయుడు. అక్టోబర్ లేదా నవంబర్‌లోగా ఎన్నికల ప్రక్రియను పూర్తి చేయాలని మంత్రులకు స్పష్టం చేశారు.
ఇటీవల తాను నిర్వహించిన మంత్రివర్గ సమావేశంలో ఈ అంశంపైనే ఎక్కువ చర్చ జరిగినట్టు తెలుస్తోంది. కూటమి అభ్యర్థుల విజయాన్ని నిర్ధారించే బాధ్యతను ఆయా శాఖల ఇన్‌ఛార్జి మంత్రులకు అప్పగించారు. తొలుత మున్సిపల్ ఎన్నికలు, ఆ తర్వాత ఎంపీటీసీ, జడ్పీటీసీ ఎన్నికలు, చివరగా గ్రామ పంచాయతీ ఎన్నికలు నిర్వహించే క్రమాన్ని ప్రభుత్వం యోచిస్తోంది. ఈ ప్రక్రియ మొత్తాన్నీ 2027లోకి వాయిదా పడకుండా ఈ ఏడాదిలోగానే పూర్తి చేయాలన్నది సర్కారు లక్ష్యం.
సెప్టెంబర్ 6, 7న ఎమ్మెల్యేలకు వర్క్‌షాప్
ఎన్నికల సన్నద్ధతలో భాగంగా సెప్టెంబర్ 6, 7 తేదీల్లో ఎమ్మెల్యేలందరికీ ప్రత్యేక వర్క్‌షాప్ నిర్వహించనున్నారు. పార్టీపరంగా, సంస్థాగతంగా తీసుకోవాల్సిన వ్యూహాలపై ఈ వర్క్‌షాప్‌లో దిశానిర్దేశం చేయనున్నారు. మున్సిపల్ ఎన్నికలు రెండేళ్ల పాలనపై తొలి పరీక్షగా మారనున్న నేపథ్యంలో, ఫలితాలు ప్రజాభిప్రాయానికి సూచికగా నిలుస్తాయని రాజకీయ వర్గాలు భావిస్తున్నాయి.
ఎస్‌ఐఆర్, బీసీ రిజర్వేషన్లకు సంబంధించిన కోర్టు కేసులను వేగంగా పరిష్కరించి, ఎన్నికల నిర్వహణకు అడ్డంకులు లేకుండా చూడాలని అధికారులను ప్రభుత్వం ఆదేశించింది. మంత్రి నారా లోకేష్ మంత్రివర్గ సమావేశానికి ముందు మంత్రులతో అల్పాహార సమావేశం నిర్వహించి ఎన్నికల సన్నద్ధతపై చర్చించారు. అక్టోబర్ నుంచి దశలవారీగా కొత్త పింఛన్లు పంపిణీ చేయనున్నట్టు లోకేష్ తెలిపారు.
జెన్ జీ ఓటర్లతో నేరుగా సంభాషించి, ప్రభుత్వ పథకాలు, అభివృద్ధి కార్యక్రమాలపై అవగాహన కల్పించాలని పార్టీ నాయకత్వం సూచించింది. ప్రజల భూ సమస్యలపైనా ప్రభుత్వం దృష్టి సారించింది. చేతిలో ఉన్నా పత్రాలు లేని భూములకు పట్టాలు ఇచ్చే యోచనలో ఉంది.