గణేష్ నవరాత్రి ఉత్సవాల అనంతరం నిర్వహించనున్న గణేష్ నిమజ్జనం కార్యక్రమాన్ని పకడ్బందీగా, ప్రశాంత వాతావరణంలో నిర్వహించేందుకు అవసరమైన ఏర్పాట్లపై కర్నూలు జిల్లా కలెక్టర్ డాక్టర్ ఏ. సిరి సమీక్ష సమావేశం నిర్వహించారు. కలెక్టరేట్‌లోని మినీ కాన్ఫరెన్స్ హాల్లో జరిగిన ఈ సమావేశానికి ఉత్సవ కమిటీ సభ్యులు, సంబంధిత శాఖల అధికారులు హాజరయ్యారు.
ఈ సందర్భంగా జిల్లా కలెక్టర్ మాట్లాడుతూ.. నిమజ్జనం ఊరేగింపు మార్గాల్లో ట్రాఫిక్ నియంత్రణ, భద్రతా ఏర్పాట్లు, నిమజ్జన ప్రదేశాల్లో మౌలిక సదుపాయాల కల్పనపై సంబంధిత అధికారులకు తగిన సూచనలు ఇచ్చారు. పండుగ సందర్భంగా శాంతిభద్రతలకు విఘాతం కలగకుండా అన్ని శాఖలు సమన్వయంతో పనిచేయాలని, ప్రజలకు ఎలాంటి అసౌకర్యం కలగకుండా ఏర్పాట్లు చేయాలని ఆదేశించారు.
నిమజ్జన ప్రదేశాల వద్ద తాగునీరు, విద్యుత్ దీపాలు, వైద్య సదుపాయాలు, అగ్నిమాపక సిబ్బంది అందుబాటులో ఉండేలా చర్యలు తీసుకోవాలని కలెక్టర్ సూచించారు. అలాగే కాలుష్య నివారణ చర్యల్లో భాగంగా పర్యావరణ హిత గణేష్ విగ్రహాల వినియోగంపై ప్రజల్లో అవగాహన కల్పించాలని, నిమజ్జనం అనంతరం ప్రదేశాల పరిశుభ్రతపై దృష్టి సారించాలని పురపాలక శాఖ అధికారులకు సూచించారు.
ఉత్సవ కమిటీ సభ్యుల నుంచి వచ్చిన సూచనలు, విజ్ఞప్తులను కలెక్టర్ ఓపిగ్గా ఆలకించి, వాటిని పరిష్కరించేందుకు అధికారులకు తగిన ఆదేశాలు జారీ చేశారు. పండుగను అంగరంగ వైభవంగా, ఎలాంటి అవాంఛనీయ సంఘటనలు చోటుచేసుకోకుండా నిర్వహించేందుకు జిల్లా యంత్రాంగం సిద్ధంగా ఉందని కలెక్టర్ డాక్టర్ ఏ. సిరి తెలిపారు.
ఈ సమావేశంలో పోలీసు, రెవెన్యూ, పురపాలక, విద్యుత్, వైద్య ఆరోగ్య శాఖలతో పాటు ఇతర సంబంధిత శాఖల అధికారులు పాల్గొన్నారు.