గ్లోబరీనా టెక్నాలజీస్ సంస్థతో తనకు సంబంధం ఉందంటూ ముఖ్యమంత్రి రేవంత్ రెడ్డి చేసిన ఆరోపణలపై బీఆర్ఎస్ వర్కింగ్ ప్రెసిడెంట్ కేటీఆర్ న్యాయపరమైన నోటీసు జారీ చేశారు.
2019 ఇంటర్మీడియట్ ఫలితాల వివాదంలో గ్లోబరీనా సంస్థది తనకు అనుబంధ (బినామీ) సంస్థ అంటూ సీఎం రేవంత్ చేసిన వ్యాఖ్యలను 'తప్పుడు, పరువు నష్టం కలిగించేవి' అని కేటీఆర్ తీవ్రంగా ఖండించారు. ఆ సంస్థతో తనకు యాజమాన్య, ఆర్థిక సంబంధం ఏమాత్రం లేదని, ఆరోపణలను రుజువు చేయాలని సీఎంను సవాలు చేశారు.
48 గంటల్లోగా ఆరోపణలను నిరూపించలేకపోతే బేషరతుగా బహిరంగ క్షమాపణ చెప్పాలని, లేనిపక్షంలో పరువు నష్టం దావాతో సహా తగిన సివిల్, క్రిమినల్ చట్టపరమైన చర్యలు తీసుకుంటానని కేటీఆర్ నోటీసులో పేర్కొన్నారు. సీఐడీ, సీబీఐ, సిట్ ఏ దర్యాప్తు సంస్థ విచారణకైనా సహకరించేందుకు సిద్ధమని, పాలిగ్రాఫ్ (లై డిటెక్టర్) పరీక్షకు కూడా సుముఖంగా ఉన్నానని ప్రకటించారు.
కాంగ్రెస్, బీజేపీల మధ్య రహస్య అవగాహన ఉందని, అందుకే కేంద్రంపై సీఎం రేవంత్ ప్రశ్నించడం లేదని కేటీఆర్ ఆరోపించారు. సింగరేణిలో అవినీతిపై తాము చేసిన ఫిర్యాదులపై కేంద్రం మౌనం వహిస్తోందని కూడా విమర్శించారు.
కోడంగల్‌లో కాంగ్రెస్ నిర్వహించిన నిరసన కార్యక్రమంలో, 2019 ఇంటర్ ఫలితాల్లో అవకతవకల వల్ల 27 మంది విద్యార్థులు ఆత్మహత్య చేసుకున్నారని, ఆ ఫలితాలను రూపొందించిన సంస్థతో బీఆర్ఎస్‌కు సంబంధం ఉందని సీఎం రేవంత్ ఆరోపించిన నేపథ్యంలో ఈ వివాదం రాజుకుంది.