బెంగళూరు, అక్టోబర్ 2: నందీ మౌలిక వసతుల కారిడార్ ఎంటర్‌ప్రైజ్ (నైస్) ప్రాజెక్టును చేజిక్కించుకునేందుకు కర్ణాటక ముఖ్యమంత్రి డి.కె. శివకుమార్ హైదరాబాద్‌కు చెందిన వ్యాపారవేత్త మహేశ్ రెడ్డితో కలిసి ప్రయత్నిస్తున్నారని కేంద్ర మంత్రి హెచ్.డి. కుమారస్వామి శుక్రవారం ఆరోపించారు.
శివకుమార్ పాపాల బిందె నిండిందని వ్యాఖ్యానించిన కుమారస్వామి, భూములను సంపాదించాలనుకుంటే చట్టబద్ధంగా, సరైన మార్గాల్లో చేయాలని, బెంగళూరు–మైసూరు ఎక్స్‌ప్రెస్‌వే ఇప్పటికే నిర్మితమైందని అన్నారు. ఈ రెండు నగరాల మధ్య 1.75 లక్షల ఎకరాలను గుర్తించారని, ఆ భూములను వినియోగించుకునే ప్రయత్నం జరుగుతోందని, తెలంగాణకు చెందిన వ్యాపారవేత్తకు రెడ్ కార్పెట్ పరుస్తున్నారని ఆరోపించారు.
నైస్ ప్రాజెక్టుపై కర్ణాటక హైకోర్టు ఇప్పటికే తీవ్ర వ్యాఖ్యలు చేసిందని, ఆ సంస్థ సుప్రీంకోర్టును ఆశ్రయించిందని ఆయన గుర్తుచేశారు. విలేకరుల సమావేశంలో ఎమ్మెల్సీ జవరే గౌడ, మాజీ ఎమ్మెల్యే ఎ. మంజునాథ్, గ్రేటర్ బెంగళూరు జేడీ(ఎస్) అధ్యక్షుడు హెచ్.ఎం. రమేశ్ గౌడ తదితరులు పాల్గొన్నారు. (ఐఏఎన్ఎస్)