మెక్సికో సిటీ (ఎక్స్‌ప్రెస్ టుడే): అత్యంత శక్తివంతమైన హరికేన్ సైమన్ కేంద్రం ఆదివారం తెల్లవారుజామున మెక్సికో పసిఫిక్ తీరానికి అతి సమీపంలో ఉందని, గంటకు 155 మైళ్ల (సుమారు 250 కి.మీ.) వేగంతో గాలులు వీస్తున్నాయని అమెరికా మీడియా తెలిపింది. తుపాను ఆదివారం తర్వాత భూభాగంపైకి ప్రవేశించే అవకాశం ఉందని అంచనా.
అమెరికా జాతీయ హరికేన్ కేంద్రం (ఎన్‌హెచ్‌సీ) అంచనా ప్రకారం సైమన్ మాన్‌జనిల్లో రేవు, ప్యూర్టో వల్లార్టా మధ్య తీరాన్ని తాకవచ్చు. ఈ ప్రాంతంలో జలిస్కో, కొలిమా రాష్ట్రాలు ఉన్నాయి. మిచోఅకాన్‌లోని పుంటా శాన్ టెల్మో నుంచి నయారిట్‌లోని పుంటా మితా వరకు హరికేన్ హెచ్చరిక అమల్లో ఉంది.
నైరుతి మెక్సికోలో 20 నుంచి 38 సెంటీమీటర్ల వర్షం, కొన్ని చోట్ల 64 సెంటీమీటర్ల వరకు కురవవచ్చని, ప్రాణాపాయ వరదలు, తీరంలో ప్రమాదకర ఉప్పెన ముప్పు ఉందని హెచ్చరించారు. ఇళ్లలోనే లేదా తాత్కాలిక ఆశ్రయాల్లోనే ఉండాలని పౌర రక్షణ జాతీయ సమన్వయకర్త లౌరా వెలాస్కెజ్ ప్రజలను కోరారు. గత వారం హరికేన్ పోలో బాజా కాలిఫోర్నియా ద్వీపకల్పాన్ని కేటగిరీ-2 తుపానుగా తాకిన విషయం తెలిసిందే.