టెల్ అవీవ్, అక్టోబర్ 3: ఫ్లైదుబాయ్ విమానాన్ని కూల్చేందుకు ప్రయత్నించిన ఒమన్ కో-పైలట్ హమామ్ అల్-హమ్మామీని తీవ్రవాద భావాలు అలవరచుకున్నాడనే ఆందోళనలతో ఒమన్ గతంలో విమానం నడపకుండా నిషేధించినట్లు ఒక ప్రాంతీయ అధికారి, ఈ వ్యవహారం తెలిసిన మరో వ్యక్తి తెలిపారని ఏపీ వార్తా సంస్థ పేర్కొంది. ఆ తర్వాత అతడిని యూఏఈకి చెందిన ఫ్లైదుబాయ్ నియమించుకుందని వారు చెప్పారు.
నియామకానికి ముందు సాధారణ భద్రతా తనిఖీలు జరిగాయని ఒక గల్ఫ్ దౌత్యవేత్త చెప్పారు. అయితే ఆ తనిఖీలు నేర నిర్ధారణలపైనే దృష్టి పెట్టాయని, తీవ్రవాద ధోరణుల సంకేతాల వరకు వెళ్లలేదని కనిపిస్తోందని ఏపీ పేర్కొంది. నాలుగు ప్రాంతీయ దేశాల భద్రతా సంస్థలు అమెరికా, ఇతర పాశ్చాత్య దేశాల సహకారంతో అతడి ఉద్దేశాలపై దర్యాప్తు చేస్తున్నాయి. ఉగ్రవాద సంస్థలతో సంబంధాలేవీ ఇప్పటివరకు బయటపడలేదని, అతడు ఒంటరిగానే వ్యవహరించి ఉండవచ్చని ఆ దౌత్యవేత్త అభిప్రాయపడ్డారు.
హమ్మామీ యూఏఈలో జన్మించాడని, తల్లి సిరియన్ అని, తండ్రి ద్వారా ఒమన్ పౌరసత్వం పొందాడని, సిరియాకు కూడా వెళ్లివచ్చాడని ప్రాంతీయ అధికారి తెలిపారు.
ఇజ్రాయెల్ చానల్ 12 కథనం ప్రకారం, అతడు గతంలో దుబాయ్–టెల్ అవీవ్ మార్గంలో పలుమార్లు విమానాలు నడిపాడు; అయినా ఇజ్రాయెల్‌కు అతడి గురించి సమాచారం లేదు. సిబ్బంది పేర్ల జాబితాను ఫ్లైదుబాయ్ ముందుగానే ఇజ్రాయెల్ అధికారులకు అందజేసిందని, అందులో భద్రతాపరమైన అనుమానాలేవీ కనిపించలేదని ఆ కథనం పేర్కొంది. విదేశీ విమాన సంస్థల పైలట్ల నేపథ్య తనిఖీలను రవాణా శాఖ పర్యవేక్షించాల్సి ఉన్నా అలా జరగడం లేదని, షిన్ బెట్, మొసాద్ కూడా తనిఖీ చేయడం లేదని అనామక భద్రతా వర్గాలను ఉటంకిస్తూ ఆ కథనం ఆరోపించింది.
శత్రు దేశాల పైలట్లు విదేశీ విమాన సంస్థల్లో పనిచేస్తూ ఇజ్రాయెల్ మార్గంలో నడుపుతున్నారేమో అని ఇజ్రాయెల్ హడావుడిగా పరిశీలిస్తోందని, ఇరాన్, సిరియా, ఇరాక్ పైలట్లు ద్వంద్వ పౌరసత్వంతో ఇలా నడిపినట్లు చానల్ 12 తెలిపింది. యషార్ పార్టీ నేత గాడీ ఐసెన్‌కోట్ ఈ వైఫల్యంపై ప్రధాని నెతన్యాహు ప్రభుత్వాన్ని విమర్శించారు. ఈ ఘటనను ఉగ్రదాడిగా ఇజ్రాయెల్ అధికారులు, ఎమిరేట్స్ న్యాయ అధికారులు అభివర్ణించారు.