హను రాఘవపూడి దర్శకత్వంలో ప్రభాస్ నటిస్తున్న 'ఫౌజీ' చిత్రం నుంచి స్వాతంత్ర్య దినోత్సవం సందర్భంగా ఈరోజు ప్రత్యేక గ్లింప్స్ విడుదల చేస్తారన్న ప్రచారం అభిమానుల్లో ఉత్కంఠ రేపుతోంది.
1940ల నాటి బ్రిటిష్ పాలన, రెండో ప్రపంచ యుద్ధం నేపథ్యంలో ఆజాద్ హింద్ ఫౌజ్ స్ఫూర్తితో సాగే కథాంశంతో ఈ చిత్రాన్ని తెరకెక్కిస్తున్నారు. ప్రభాస్ ఒక సైనికాధికారి పాత్రలో కనిపించనుండగా, ఇమాన్వీ హీరోయిన్‌గా పరిచయమవుతున్నారు. మిథున్ చక్రవర్తి, జయప్రద, అనుపమ్ ఖేర్ కీలక పాత్రల్లో నటిస్తున్నారు.
మైత్రీ మూవీ మేకర్స్, టీ-సిరీస్ సంయుక్తంగా నిర్మిస్తున్న ఈ చిత్రం డిసెంబర్ 3, 2026న ప్రపంచవ్యాప్తంగా విడుదల కానుంది. దేశభక్తి నేపథ్యం ఉన్న ఈ చిత్రం నుంచి స్వాతంత్ర్య దినోత్సవం సందర్భంగా ఒక గ్లింప్స్ లేదా ప్రోమో వస్తుందని అభిమానులు ఆశిస్తున్నారు.
అయితే, చిత్రంలో కీలక పాత్ర పోషిస్తున్న ఒక నటుడికి వీసా సంబంధిత ఇబ్బందులు తలెత్తడంతో, ఆయన భాగాలను గ్లింప్స్‌లో చేర్చాలనుకున్న నిర్మాతల ప్రణాళికలకు అవాంతరం కలిగినట్టు సమాచారం. దీంతో ప్రకటిత గ్లింప్స్ వాయిదా పడే అవకాశం ఉందని కొందరు అంటుండగా, చివరి నిమిషంలో ఏదైనా ప్రకటన వెలువడొచ్చని మరికొందరు అభిప్రాయపడుతున్నారు. దీనిపై చిత్రయూనిట్ నుంచి అధికారిక ప్రకటన ఇంకా రావాల్సి ఉంది.