లక్నో, అక్టోబర్ 1 (ఎక్స్‌ప్రెస్ టుడే): లెఫ్టినెంట్ జనరల్ సంజయ్ మిత్రా, ఏవీఎస్ఎం, అక్టోబర్ 1న భారత సైన్యం సెంట్రల్ కమాండ్ (సూర్య కమాండ్) జనరల్ ఆఫీసర్ కమాండింగ్-ఇన్-చీఫ్‌గా బాధ్యతలు స్వీకరించారు.
బాధ్యతలు చేపట్టిన సందర్భంగా లక్నో మిలిటరీ స్టేషన్‌లోని స్మృతిక వార్ మెమోరియల్ వద్ద అమరవీరులకు ఆయన నివాళులర్పించారు. అనంతరం ఉత్సవ కవాతులో గార్డ్ ఆఫ్ ఆనర్‌ను స్వీకరించారు.
కమాండ్ పరిధిలో అత్యున్నత స్థాయి కార్యాచరణ సంసిద్ధతను కొనసాగిస్తామని ఆర్మీ కమాండర్ పునరుద్ఘాటించారు. వ్యూహాత్మక స్పందన సామర్థ్యాన్ని, బహుముఖ (మల్టీ-డొమైన్) సామర్థ్యాలను మరింత బలోపేతం చేయడంపై దృష్టి పెడతామని చెప్పారు. కమాండ్‌లోని అన్ని స్థాయిల సిబ్బంది, వీర నారీలు, మాజీ సైనికులు, రక్షణ పౌర ఉద్యోగులు, వారి కుటుంబాలకు ఆయన శుభాకాంక్షలు తెలిపారు; వారి సంక్షేమం, మనోబలం, వృత్తిపరమైన ఎదుగుదలకు కట్టుబడి ఉన్నామన్నారు.
లెఫ్టినెంట్ జనరల్ సంజయ్ మిత్రా నేపథ్యం
లెఫ్టినెంట్ జనరల్ సంజయ్ మిత్రా 1989 జూన్ 10న ఇండియన్ మిలిటరీ అకాడమీ నుంచి గ్రెనేడియర్స్ రెజిమెంట్‌లో కమిషన్ పొందారు. మూడు దశాబ్దాలకు పైగా సాగిన సైనిక జీవితంలో అనేక కమాండ్, స్టాఫ్ నియామకాలు నిర్వహించారు. జమ్మూ కశ్మీర్ ఉత్తర ప్రాంతంలోని నియంత్రణ రేఖ (ఎల్ఓసీ), తూర్పు లద్దాఖ్‌లోని వాస్తవాధీన రేఖ (ఎల్ఏసీ) వెంట ఇన్‌ఫ్యాంట్రీ బెటాలియన్, ఇన్‌ఫ్యాంట్రీ బ్రిగేడ్, ఇన్‌ఫ్యాంట్రీ డివిజన్‌కు నాయకత్వం వహించారు.
బెల్గాంలోని కమాండో స్కూల్‌లో ఇన్‌స్ట్రక్టర్‌గా, వెల్లింగ్టన్‌లోని డిఫెన్స్ సర్వీసెస్ స్టాఫ్ కాలేజీలో చీఫ్ ఇన్‌స్ట్రక్టర్ (ఆర్మీ)గా సేవలందించారు. నేషనల్ సెక్యూరిటీ గార్డ్ (ఎన్ఎస్‌జీ)లో స్క్వాడ్రన్ కమాండర్‌గా, ఆర్మీ వార్ కాలేజీ ఫ్యాకల్టీ ఆఫ్ స్టడీస్‌లో కల్నల్ జనరల్ స్టాఫ్‌గా కూడా పనిచేశారు.
2023లో లెఫ్టినెంట్ జనరల్‌గా పదోన్నతి పొందిన ఆయన 2023 జూన్ 9న ఐ కార్ప్స్ బాధ్యతలు స్వీకరించి, 2025 జూన్ 17న వైదొలిగారు. ఆ తర్వాత ఆర్మీ ప్రధాన కార్యాలయంలో డైరెక్టర్ జనరల్ (ఆపరేషనల్ లాజిస్టిక్స్ & స్ట్రాటజిక్ మూవ్‌మెంట్)గా పనిచేశారు. అతి విశిష్ట సేవా పతకంతో పాటు ఆర్మీ చీఫ్, ఆర్మీ కమాండర్ ప్రశంసలు అందుకున్నారు.