న్యూఢిల్లీ, అక్టోబర్ 2 (ఎక్స్‌ప్రెస్ టుడే): భారత వైమానిక దళం కోసం 114 రాఫేల్ యుద్ధ విమానాల కొనుగోలుపై ప్రస్తుత ఆర్థిక సంవత్సరం ముగిసేలోపు సేకరణ నిర్ణయం తీసుకునే అవకాశం ఉందని రక్షణ కార్యదర్శి రాజేశ్ కుమార్ సింగ్ తెలిపారు.
గురువారం ఏఎన్ఐతో మాట్లాడుతూ ఆయన ఈ విషయం చెప్పారు. కొనుగోలు అధికారులు ఫ్రాన్స్ ప్రభుత్వం, డసో ఏవియేషన్‌తో చర్చలు జరుపుతున్నారని వివరించారు.
రాఫేల్ జెట్లలో స్వదేశీకరణ స్థాయిని, ఆయుధ అనుసంధానాన్ని పెంచాలని భారత్ ఒత్తిడి తెస్తోందని ఆయన చెప్పారు. కేవలం ఫ్రెంచ్ ఆయుధాలపైనే ఆధారపడకుండా, భారత ఆయుధ వ్యవస్థలను కూడా అనుసంధానించేందుకు విమానాల్లోని ఆయుధాలను మదింపు చేయాల్సి ఉందన్నారు. నౌకాదళం కొనుగోలు చేసిన రాఫేల్ మెరైన్ జెట్లపై స్వదేశీ క్షిపణులను మోసుకెళ్లేలా ఇప్పటికే హామీలు లభించాయని తెలిపారు. ప్రతిపాదిత 114 జెట్లకు సంబంధించి ఆయుధ అనుసంధానంపై మరిన్ని చర్చలు జరుగుతాయన్నారు.
ఈ ఏడాది ఫిబ్రవరిలో రక్షణ కొనుగోళ్ల మండలి (డీఏసీ) రూ.3.25 లక్షల కోట్ల విలువైన ఈ ప్రతిపాదనకు ఆమోదం తెలిపింది. తుది ఒప్పందానికి భద్రతపై కేబినెట్ కమిటీ (సీసీఎస్) ఆమోదం కూడా అవసరం. ప్రస్తుతం భారత వైమానిక దళం వద్ద 36 రాఫేల్ జెట్లు ఉండగా, నౌకాదళం 26 రాఫేల్-ఎం విమానాలకు ఆర్డర్ ఇచ్చింది.