విశాఖపట్నం, అక్టోబర్ 17 (ఎక్స్‌ప్రెస్ టుడే): రైల్వే మౌలిక సదుపాయాల ఆధునికీకరణ, భద్రత పెంపుదల, లైన్ కెపాసిటీ విస్తరణ దిశగా దక్షిణ కోస్తా రైల్వే మరో మైలురాయిని అధిగమించింది. గుంతకల్ డివిజన్ పరిధిలోని ఆదోని, ఇసివి, కుప్పగల్, కోసిగి స్టేషన్ల మధ్య అత్యంత కీలకమైన 28.112 రూట్ కిలోమీటర్ల (56.224 ట్రాక్ కిలోమీటర్ల) డబుల్ లైన్ మార్గంలో ఆటోమేటిక్ బ్లాక్ సిగ్నలింగ్ వ్యవస్థను 2026 అక్టోబర్ 16న విజయవంతంగా ప్రారంభించారు.
సుమారు రూ.500 కోట్ల అంచనా వ్యయంతో మంజూరైన సమగ్ర భద్రత, సామర్థ్య విస్తరణ చర్యల్లో భాగంగా ఈ ప్రాజెక్టును చేపట్టారు. ఈ విభాగం ప్రారంభంతో రద్దీ అధికంగా ఉండే మొత్తం గుంతకల్–రాయచూర్ కారిడార్ పూర్తిగా ఆటోమేటెడ్ సిగ్నలింగ్ సెక్షన్‌గా రూపాంతరం చెందింది. దీంతో దక్షిణ కోస్తా రైల్వే తన నెట్‌వర్క్ పరిధిలో మొత్తం 105 రూట్ కిలోమీటర్ల మేర ఆటోమేటిక్ బ్లాక్ సిగ్నలింగ్‌ను పూర్తి చేసింది.
కొత్తగా ప్రారంభించిన 28.112 రూట్ కిలోమీటర్ల పరిధిలో — ఆదోని–ఇసివి (6.64 రూట్ కి.మీ), ఇసివి–కుప్పగల్ (7.79 రూట్ కి.మీ), కుప్పగల్–కోసిగి (13.68 రూట్ కి.మీ) — అత్యాధునిక సిగ్నలింగ్, పటిష్టమైన భద్రతా మౌలిక సదుపాయాలను సమకూర్చారు. ఈ మూడు విభాగాల్లో పొరపాట్లకు తావులేని రైలు గుర్తింపు వ్యవస్థ కోసం 178 డిటెక్షన్ పాయింట్లతో కూడిన ఆధునిక డ్యూయల్ మల్టీ-సెక్షన్ డిజిటల్ యాక్సిల్ కౌంటర్లను ఏర్పాటు చేశారు.
ఈ ప్రాజెక్టులో భాగంగా 38 కొత్త మెయిన్‌లైన్ సిగ్నల్స్, 24 స్టేషన్ సెమీ-ఆటోమేటిక్ సిగ్నల్స్, 5 ప్రత్యేక ఏబీఎస్ హట్స్‌ను అందుబాటులోకి తెచ్చారు. లెవల్ క్రాసింగ్ గేట్ల వద్ద భద్రతను మరింత పటిష్టం చేసేందుకు ఎల్సీ గేట్ నెం.204ను సిగ్నలింగ్ నెట్‌వర్క్‌తో అనుసంధానించారు (ఇంటర్‌లాకింగ్ చేశారు). అంతేకాకుండా ఎల్సీ గేట్లు 195, 199, 201, 204, 205ల వద్ద ఆధునిక అప్రోచ్ లాకింగ్, ఆడియో-విజువల్ అప్రోచ్ వార్నింగ్ వ్యవస్థలను ఏర్పాటు చేశారు.
నిరంతర విద్యుత్ సరఫరా కోసం 5 అత్యాధునిక ఇంటిగ్రేటెడ్ పవర్ సప్లై యూనిట్లు, రియల్-టైమ్ పరికరాల పనితీరు పర్యవేక్షణ, విశ్లేషణల కోసం 5 అధునాతన డేటా లాగర్లు, అలాగే నాన్-వైటల్ మల్టీప్లెక్సర్లతో పాటు 16 యూనివర్సల్ ఫెయిల్-సేఫ్ బ్లాక్ ఇంటర్‌ఫేస్ సెట్లతో ఈ సిగ్నలింగ్ వ్యవస్థను మరింత బలోపేతం చేశారు.
సాధారణ రైళ్ల రాకపోకలకు ఎలాంటి అంతరాయం కలగకుండా ఈ విస్తరణ పనులను విజయవంతంగా పూర్తి చేసిన ప్రాజెక్ట్స్ విభాగం, సిగ్నల్ & టెలికమ్యూనికేషన్స్ విభాగపు అధికారులు, ఇంజనీర్లు, క్షేత్రస్థాయి సిబ్బందిని దక్షిణ కోస్తా రైల్వే జనరల్ మేనేజర్ సందీప్ మాథుర్ ప్రత్యేకంగా అభినందించారు.