కవిటి, అక్టోబర్ 31 (ఎక్స్‌ప్రెస్ టుడే): విద్యార్థులకు నాణ్యమైన విద్యతో పాటు మెరుగైన మౌలిక వసతులు కల్పించేందుకు తన వంతు కృషి చేస్తానని ప్రముఖ ఎన్నికల వ్యూహకర్త, డా. ప్రవీణ్ పుల్లట తెలిపారు. కవిటి మండలం బి.గొనపపుట్టుగ ఉన్నత పాఠశాలను శనివారం ఆయన సందర్శించారు. ఈ సందర్భంగా పదవ తరగతి విద్యార్థులతో ప్రత్యేకంగా ముచ్చటించి, విద్య ప్రాముఖ్యత, భవిష్యత్తులో ఉన్నత లక్ష్యాలను నిర్దేశించుకోవాల్సిన అవసరం గురించి వివరించారు. ప్రస్తుత పోటీ ప్రపంచంలో విద్యార్థులు కేవలం పాఠ్యపుస్తకాలకే పరిమితం కాకుండా, సాంకేతిక పరిజ్ఞానంపై కూడా అవగాహన పెంచుకోవాలని సూచించారు.
ముఖ్యంగా ఆర్టిఫిషియల్ ఇంటెలిజెన్స్ ప్రాధాన్యత రోజురోజుకూ పెరుగుతోందని, భవిష్యత్తులో అనేక రంగాల్లో ఆర్టిఫిషియల్ ఇంటెలిజెన్స్ కీలక పాత్ర పోషించనుందని పేర్కొన్నారు. విద్యార్థులు సాంకేతికతను సరైన రీతిలో ఉపయోగించుకుంటూ తమ నైపుణ్యాలను అభివృద్ధి చేసుకోవాలని సూచించారు. అదే సమయంలో మొబైల్ ఫోన్లు, టెలివిజన్ వంటి వాటికి అనవసరంగా సమయం కేటాయించకుండా చదువు, క్రమశిక్షణ, లక్ష్యసాధనపై దృష్టి సారించాలని పిలుపునిచ్చారు.
పదవ తరగతి విద్యార్థులకు ఇది ఎంతో కీలకమైన దశ అని, ఈ సమయంలో కష్టపడి చదివి మంచి ఫలితాలు సాధిస్తే భవిష్యత్తుకు బలమైన పునాది ఏర్పడుతుందని చెప్పారు. గ్రామీణ ప్రాంత విద్యార్థుల్లో అపారమైన ప్రతిభ ఉందని, సరైన ప్రోత్సాహం, మార్గదర్శకత్వం లభిస్తే వారు ఉన్నత శిఖరాలను అధిరోహించగలరని ఆశాభావం వ్యక్తం చేశారు. ఈ సందర్భంగా తన తాతగారి ఊరితో తనకున్న అనుబంధాన్ని, చిన్ననాటి జ్ఞాపకాలను గుర్తుచేసుకున్నారు. స్వగ్రామ ప్రాంతంలోని విద్యా సంస్థల అభివృద్ధికి తన వంతు సహకారం అందించడం బాధ్యతగా భావిస్తున్నానని తెలిపారు.
పాఠశాలలో విద్యార్థులకు అవసరమైన మౌలిక వసతులు, తరగతి గదులు, ఇతర సదుపాయాల మెరుగుదలకు కృషి చేస్తానని పాఠశాల ప్రధానోపాధ్యాయుడు వీరభద్రరావుకు హామీ ఇచ్చారు. విద్యా రంగ అభివృద్ధికి సమాజంలోని ప్రతి ఒక్కరూ భాగస్వాములు కావాలని, ప్రభుత్వ పాఠశాలల బలోపేతానికి ప్రజలు, పూర్వ విద్యార్థులు, స్వచ్ఛంద సంస్థలు ముందుకు రావాలని ఈ సందర్భంగా ఆయన ఆకాంక్షించారు.
ఈ కార్యక్రమంలో పాఠశాల ఉపాధ్యాయులు, స్థానికులు జి. రవి, సర్వేశ్వరరావు, బి. కృష్ణారావు, జి. కాళీ ప్రసాద్, ఎన్. బాలకృష్ణ పాల్గొన్నారు.